khel to bilkul ayan hai

khel to bilkul ayaañ hai

chor ghar kā pāsbāñ hai

so ga.ī hai ruuh kab kī

bas badan hī to ravāñ hai

hai baḌī lambī kahānī

āsmāñ par āsmāñ hai

gūñjtī āvāz koī

shaḳhs koī ham-zabāñ hai

jāntā huuñ sab haqīqat

ye mujhe kaisā gumāñ hai

jo bhī chāhe juḌ rahā hai

ishq hai yā kārvāñ hai

mas.ala pūchhā ki kyā hai

to fulāñ bolā fulāñ hai

jo rahe the mar ga.e sab

jo bachā hai vo makāñ hai

jāntā hai baaġh saarā

ḳhuub shātir titliyāñ hai

khel to bilkul ayan hai

chor ghar ka pasban hai

so gai hai ruh kab ki

bas badan hi to rawan hai

hai baDi lambi kahani

aasman par aasman hai

gunjti aawaz koi

shaKHs koi ham-zaban hai

jaanta hun sab haqiqat

ye mujhe kaisa guman hai

jo bhi chahe juD raha hai

ishq hai ya karwan hai

masala puchha ki kya hai

to fulan bola fulan hai

jo rahe the mar gae sab

jo bacha hai wo makan hai

jaanta hai bagh sara

KHub shatir titliyan hai