KHema-zan kaun hai aaKHir ye kanar-e-dil par

ḳhema-zan kaun hai āḳhir ye kanār-e-dil par

kis kā afsūñ hai ki raushan haiñ ishāre dil par

shām-e-e.ajāz ajab aa.ī hai tanhā.ī meñ

kahkashāñ se utar aa.e sitāre dil par

lag gayā thā kisī ruḳhsat pe jo mābain-e-shabāb

daaġh us zaḳhm kā ab tak hai hamāre dil par

jaise mahfūz ho tum mere nihāñ jazboñ meñ

kyā usī tarah maiñ zinda huuñ tumhāre dil par

jab ki ham bhī nahīñ āmāda baġhāvat pe abhī

kaise uḌte hue āḳhir haiñ sharāre dil par

jo mile dahr se vābasta tasāvīr ke saath

rakh liye dard to ham ne bhī vo saare dil par

kaun mahjūb hai āñkhoñ se ba-zāhir 'rāshid'

kis ke hone ke yuuñ sābit haiñ nazāre dil par

KHema-zan kaun hai aaKHir ye kanar-e-dil par

kis ka afsun hai ki raushan hain ishaare dil par

sham-e-eajaz ajab aai hai tanhai mein

kahkashan se utar aae sitare dil par

lag gaya tha kisi ruKHsat pe jo mabain-e-shabab

dagh us zaKHm ka ab tak hai hamare dil par

jaise mahfuz ho tum mere nihan jazbon mein

kya usi tarah main zinda hun tumhaare dil par

jab ki hum bhi nahin aamada baghawat pe abhi

kaise uDte hue aaKHir hain sharare dil par

jo mile dahr se wabasta tasawir ke sath

rakh liye dard to hum ne bhi wo sare dil par

kaun mahjub hai aankhon se ba-zahir 'rashid'

kis ke hone ke yun sabit hain nazare dil par