khet se bach kar guzre basti ko virani de

khet se bach kar guzre bastī ko vīrānī de

vo dariyā kyā dariyā jo sāgar ko paanī de

sher sunā koī aisā jis se lage badan meñ aag

niiñd uḌ jaa.e jis se aisī koī kahānī de

suukh rahe haiñ bāġh-baġhīche nahreñ ret huiiñ

ai mausam ke mālik ik mausam bārānī de

ḳhud banvā.e mahal do-mahle ham ko sunā.e hadīs

ḳhud to pahne abā qabā ham ko uryānī de

toḌ ga.ī dam āḳhir pyāsī raat amāvas kī

pyāre sūraj ab to apne chāñd ko paanī de

kaun sunegā terā qissa rone-dhone kā

lailā majnūñ shāmil kar koī raajā raanī de

ab tak tum ne 'bāqar' aise kaun se kaam kiye

kis ummīd pe mālik tum ko na.ī javānī de

khet se bach kar guzre basti ko virani de

wo dariya kya dariya jo sagar ko pani de

sher suna koi aisa jis se lage badan mein aag

nind uD jae jis se aisi koi kahani de

sukh rahe hain bagh-baghiche nahren ret huin

ai mausam ke malik ek mausam barani de

KHud banwae mahal do-mahle hum ko sunae hadis

KHud to pahne aba qaba hum ko uryani de

toD gai dam aaKHir pyasi raat amawas ki

pyare suraj ab to apne chand ko pani de

kaun sunega tera qissa rone-dhone ka

laila majnun shamil kar koi raja rani de

ab tak tum ne 'baqar' aise kaun se kaam kiye

kis ummid pe malik tum ko nai jawani de