khiDkiyan mat khol jins-e-jaan uTha le jaega

khiḌkiyāñ mat khol jins-e-jāñ uThā le jā.egā

ghar ke ghar ko shahr kā relā bahā le jā.egā

sab namak ehsās kā saarī halāvat zaḳhm kī

aane vaale din kā Dar saarā maza le jā.egā

is barastī raat kā ye āḳhirī aañsū bhī kal

mujh se chāhat us kī āñkhoñ se vafā le jā.egā

kisht-e-dil ko chaaT legā kirm-e-duniyā aur phir

bach rahegā kuchh to vo sail-e-havā le jā.egā

jal-bujhegā ik na ik din sab kā sab shahr-e-vafā

rah ga.ī ik raakh so paanī bahā le jā.egā

tez-tar tūfāñ kī aahaT aur yahāñ miTTī na aag

ab ise aane bhī do ye mujh se kyā le jā.egā

vo mirā saffāk dushman laakh maiñ ġhāfil na huuñ

ḳhud mire ghar se mujhe ik din bulā le jā.egā

khiDkiyan mat khol jins-e-jaan uTha le jaega

ghar ke ghar ko shahr ka rela baha le jaega

sab namak ehsas ka sari halawat zaKHm ki

aane wale din ka Dar sara maza le jaega

is barasti raat ka ye aaKHiri aansu bhi kal

mujh se chahat us ki aankhon se wafa le jaega

kisht-e-dil ko chaT lega kirm-e-duniya aur phir

bach rahega kuchh to wo sail-e-hawa le jaega

jal-bujhega ek na ek din sab ka sab shahr-e-wafa

rah gai ek rakh so pani baha le jaega

tez-tar tufan ki aahaT aur yahan miTTi na aag

ab ise aane bhi do ye mujh se kya le jaega

wo mera saffak dushman lakh main ghafil na hun

KHud mere ghar se mujhe ek din bula le jaega