khiDkiyon par malgaje sae se lahrane lage

khiḌkiyoñ par malgaje saa.e se lahrāne lage

shaam aa.ī phir gharoñ meñ log ghabrāne lage

shahr kā manzar hamāre ghar ke pas-e-manzar meñ hai

ab udhar bhī ajnabī chehre nazar aane lage

dhuup kī qāsheñ hare maḳhmal pe zau dene lagīñ

saa.e kamroñ se nikal kar sehn meñ aane lage

jugnuoñ se saj ga.iiñ rāheñ kisī kī yaad kī

din kī chaukhaT par musāfir shaam ke aane lage

būñdiyāñ barsīñ havā ke bādbāñ bhī khul ga.e

niile piile pairahan saḌkoñ pe lahrāne lage

sochte haiñ kaaT deñ āñgan ke peḌoñ ko 'shafaq'

ghar kī bāteñ ye galī-kūche meñ phailāne lage

khiDkiyon par malgaje sae se lahrane lage

sham aai phir gharon mein log ghabrane lage

shahr ka manzar hamare ghar ke pas-e-manzar mein hai

ab udhar bhi ajnabi chehre nazar aane lage

dhup ki qashen hare maKHmal pe zau dene lagin

sae kamron se nikal kar sehn mein aane lage

jugnuon se saj gain rahen kisi ki yaad ki

din ki chaukhaT par musafir sham ke aane lage

bundiyan barsin hawa ke baadban bhi khul gae

nile pile pairahan saDkon pe lahrane lage

sochte hain kaT den aangan ke peDon ko 'shafaq'

ghar ki baaten ye gali-kuche mein phailane lage