khinch kar talwar jab tark-e-sitamgar rah gaya

khīñch kar talvār jab tark-e-sitamgar rah gayā

haa.e re shauq-e-shahādat maiñ taḌap kar rah gayā

milte milte rah ga.ī aañkh us kī chashm-e-mast se

hote hote lab-ba-lab sāġhar se sāġhar rah gayā

aap hī se be-ḳhabar koī rahā va.ade kī shab

kyā ḳhabar kis kī baġhal meñ kab vo dilbar rah gayā

le liyā maiñ ne kināra shauq meñ yuuñ daf.atan

shoḳhiyāñ bhūlā vo ḳhalvat meñ jhijak kar rah gayā

tujh se qātil kah diyā thā dil kā ye armān hai

dekh le āḳhir mire siine meñ ḳhanjar rah gayā

muddatoñ se sīna-e-bismil hai jis qātil kā ghar

kyā huā dil meñ agar aaj us kā ḳhanjar rah gayā

chal diye hosh-o-ḳhirad to mai-kashoñ ke chal diye

rah gayā haañ mai-kade meñ daur-e-sāġhar rah gayā

saḳht ḳhajlat hogī dekh ai shauq-e-uryānī mujhe

aaj agar ik taar bhī baaqī badan par rah gayā

kaun kahtā hai makān-e-ġhair par tum kyuuñ rah ga.e

arz to ye hai ki raste meñ mirā ghar rah gayā

pārsā.ī shaiḳh-sāhab kī dharī rah jā.egī

dast-e-sāqī meñ agar dam-bhar bhī sāġhar rah gayā

jis ke aane kī ḳhushī meñ kal se vārafta the tum

aaj bhī aate hī aate vo sitamgar rah gayā

khinch kar talwar jab tark-e-sitamgar rah gaya

hae re shauq-e-shahadat main taDap kar rah gaya

milte milte rah gai aankh us ki chashm-e-mast se

hote hote lab-ba-lab saghar se saghar rah gaya

aap hi se be-KHabar koi raha wade ki shab

kya KHabar kis ki baghal mein kab wo dilbar rah gaya

le liya main ne kinara shauq mein yun dafatan

shoKHiyan bhula wo KHalwat mein jhijak kar rah gaya

tujh se qatil kah diya tha dil ka ye arman hai

dekh le aaKHir mere sine mein KHanjar rah gaya

muddaton se sina-e-bismil hai jis qatil ka ghar

kya hua dil mein agar aaj us ka KHanjar rah gaya

chal diye hosh-o-KHirad to mai-kashon ke chal diye

rah gaya han mai-kade mein daur-e-saghar rah gaya

saKHt KHajlat hogi dekh ai shauq-e-uryani mujhe

aaj agar ek tar bhi baqi badan par rah gaya

kaun kahta hai makan-e-ghair par tum kyun rah gae

arz to ye hai ki raste mein mera ghar rah gaya

parsai shaiKH-sahab ki dhari rah jaegi

dast-e-saqi mein agar dam-bhar bhi saghar rah gaya

jis ke aane ki KHushi mein kal se warafta the tum

aaj bhi aate hi aate wo sitamgar rah gaya