khinch kar yun le chali wahshat bayaban ki taraf

khīñch kar yuuñ le chalī vahshat bayābāñ kī taraf

laa.eñ jaise tifl-e-bad-ḳhū ko dabistāñ kī taraf

faiz vahshat kā adā-e-shukr jab vājib huā

sar jhukāyā ham ne mehrāb-e-garebāñ kī taraf

hāsil-e-josh-e-junūñ hai mātam-e-hosh-o-ḳhirad

ḳhaak uḌāte jaate haiñ vahshī bayābāñ kī taraf

aql ke teġh-e-junūn-e-tez se kūche kaTe

kaun aa.e jāda-e-chāk-e-garebāñ kī taraf

kar chukā josh-e-junūñ jins-e-ḳhirad par haath saaf

lauT ab aatī hai bāzār-e-garebāñ kī taraf

ishq ke maktab meñ jab aayā paye dars-e-junūñ

pahle hī uñglī uThī nūn-e-garebāñ kī taraf

mā.il-e-zevar huā jab vo hasīn-e-jāma-zeb

chāñd aayā charḳh se tauq-e-garebāñ kī taraf

hosh meñ aate haiñ dīvāne ga.ī fasl-e-bahār

dasht-e-vahshat chhup rahe pusht-e-garebāñ kī taraf

nāḳhun-e-ġham kā nishāñ dil par hai misl-e-māh-e-nau

uñgliyāñ uThtī haiñ us zaḳhm-e-numāyāñ kī taraf

jab kisī āshiq ne kuchh hāl-e-pareshānī kahā

hañs diye muñh pher kar zulf-e-pareshāñ kī taraf

zo.af meñ jī khol kar rone kī hasrat hai mujhe

dekhtā hai yaas se har ashk dāmāñ kī taraf

sham.a ke sho.ale sitam karte haiñ misl-e-barq-e-tūr

dekhtā huuñ jab 'nazar' bazm-e-hasīnāñ kī taraf

khinch kar yun le chali wahshat bayaban ki taraf

laen jaise tifl-e-bad-KHu ko dabistan ki taraf

faiz wahshat ka ada-e-shukr jab wajib hua

sar jhukaya hum ne mehrab-e-gareban ki taraf

hasil-e-josh-e-junun hai matam-e-hosh-o-KHirad

KHak uDate jate hain wahshi bayaban ki taraf

aql ke tegh-e-junun-e-tez se kuche kaTe

kaun aae jada-e-chaak-e-gareban ki taraf

kar chuka josh-e-junun jins-e-KHirad par hath saf

lauT ab aati hai bazar-e-gareban ki taraf

ishq ke maktab mein jab aaya paye dars-e-junun

pahle hi ungli uThi nun-e-gareban ki taraf

mail-e-zewar hua jab wo hasin-e-jama-zeb

chand aaya charKH se tauq-e-gareban ki taraf

hosh mein aate hain diwane gai fasl-e-bahaar

dasht-e-wahshat chhup rahe pusht-e-gareban ki taraf

naKHun-e-gham ka nishan dil par hai misl-e-mah-e-nau

ungliyan uThti hain us zaKHm-e-numayan ki taraf

jab kisi aashiq ne kuchh haal-e-pareshani kaha

hans diye munh pher kar zulf-e-pareshan ki taraf

zoaf mein ji khol kar rone ki hasrat hai mujhe

dekhta hai yas se har ashk daman ki taraf

shama ke shoale sitam karte hain misl-e-barq-e-tur

dekhta hun jab 'nazar' bazm-e-hasinan ki taraf