khinch lai hai yahan lazzat-e-azar mujhe

khīñch laa.ī hai yahāñ lazzat-e-āzār mujhe

jahāñ paanī na mile aaj vahāñ maar mujhe

dhuup zālim hī sahī jism tavānā hai abhī

yaad aa.egā kabhī sāya-e-ashjār mujhe

sāl-hā-sāl se ḳhāmosh the gahre paanī

ab nazar aa.e haiñ āvāz ke āsār mujhe

baaġh kī qabr pe rote hue dekhā thā jise

nazar aayā vahī saaya sar-e-dīvār mujhe

gir ke sad paara huā abr meñ aTkā huā chāñd

sar pe chādar sī nazar aa.ī shab-e-tār mujhe

saañs meñ thā kisī jalte hue jañgal kā dhuāñ

sair-e-gulzār dikhāte rahe bekār mujhe

raat ke dasht meñ TuuTī thī havā kī zanjīr

sub.h mahsūs huī ret kī jhankār mujhe

vahī jaama ki mire tan pe na Thiik aatā thā

vahī in.aam milā āqibat-e-kār mujhe

jab se dekhā hai 'zafar' ḳhvāb-e-shabistān-e-ḳhayāl

bistar-e-ḳhāk pe sonā huā dushvār mujhe

khinch lai hai yahan lazzat-e-azar mujhe

jahan pani na mile aaj wahan mar mujhe

dhup zalim hi sahi jism tawana hai abhi

yaad aaega kabhi saya-e-ashjar mujhe

sal-ha-sal se KHamosh the gahre pani

ab nazar aae hain aawaz ke aasar mujhe

bagh ki qabr pe rote hue dekha tha jise

nazar aaya wahi saya sar-e-diwar mujhe

gir ke sad para hua abr mein aTka hua chand

sar pe chadar si nazar aai shab-e-tar mujhe

sans mein tha kisi jalte hue jangal ka dhuan

sair-e-gulzar dikhate rahe bekar mujhe

raat ke dasht mein TuTi thi hawa ki zanjir

subh mahsus hui ret ki jhankar mujhe

wahi jama ki mere tan pe na Thik aata tha

wahi inam mila aaqibat-e-kar mujhe

jab se dekha hai 'zafar' KHwab-e-shabistan-e-KHayal

bistar-e-KHak pe sona hua dushwar mujhe