khinch lai panw ki zanjir zindan ki taraf

khīñch laa.ī paañv kī zanjīr zindāñ kī taraf

varna ghar se ham to nikle the bayābāñ kī taraf

phir nahīñ palTīñ nigāheñ chashm-e-hairāñ kī taraf

dekhte hī rah ga.e ham rū-e-jānāñ kī taraf

kaun kahtā hai ki ham haiñ raah se bhaTke hue

jo qadam uThtā hai uThtā hai bayābāñ kī taraf

koī samjhe yā na samjhe ishq ke asrār ko

ham ishāra kar ga.e haiñ dard-e-pinhāñ kī taraf

nā-mukammal sī nazar aatī hai taufīq-e-junūñ

ruk ga.e haiñ haath baḌh kar jeb-o-dāmāñ kī taraf

dekhiye hotī hai kis din phir tajallī kī numūd

dekhtā rahtā huuñ husn-e-jalva-sāmāñ kī taraf

ab ḳhudā par hai bharosa ham ko apnī naav kā

le chalā hai nāḳhudā girdāb o tūfāñ kī taraf

ye kamāl-e-jazba-e-zauq-e-ḳhalish to dekhiye

ḳhud-baḳhud khiñchtā chalā nashtar rag-e-jāñ kī taraf

rah ga.e kyā āshiyāñ meñ aur kuchh tinke abhī

kauñdtī haiñ bijliyāñ ab tak gulistāñ kī taraf

zindagī thī ik rah-e-dushvār jis par chal paḌe

kyā qadam uThtā hamārā rāh-e-āsāñ kī taraf

gardish-e-ayyām se ye intishār-e-dahr kyā

dekhtā huuñ maiñ tirī zulf-e-pareshāñ kī taraf

kyā fareb-e-va.ada kā un ko na thā pahle ḳhayāl

dhyān hī jaatā nahīñ ab 'ahd-o-paimāñ kī taraf

'shākir'-e-nādāñ hai dard-e-ishq hī se zindagī

dekh marne ke liye jā tū na darmāñ kī taraf

khinch lai panw ki zanjir zindan ki taraf

warna ghar se hum to nikle the bayaban ki taraf

phir nahin palTin nigahen chashm-e-hairan ki taraf

dekhte hi rah gae hum ru-e-jaanan ki taraf

kaun kahta hai ki hum hain rah se bhaTke hue

jo qadam uThta hai uThta hai bayaban ki taraf

koi samjhe ya na samjhe ishq ke asrar ko

hum ishaara kar gae hain dard-e-pinhan ki taraf

na-mukammal si nazar aati hai taufiq-e-junun

ruk gae hain hath baDh kar jeb-o-daman ki taraf

dekhiye hoti hai kis din phir tajalli ki numud

dekhta rahta hun husn-e-jalwa-saman ki taraf

ab KHuda par hai bharosa hum ko apni naw ka

le chala hai naKHuda girdab o tufan ki taraf

ye kamal-e-jazba-e-zauq-e-KHalish to dekhiye

KHud-baKHud khinchta chala nashtar rag-e-jaan ki taraf

rah gae kya aashiyan mein aur kuchh tinke abhi

kaundti hain bijliyan ab tak gulistan ki taraf

zindagi thi ek rah-e-dushwar jis par chal paDe

kya qadam uThta hamara rah-e-asan ki taraf

gardish-e-ayyam se ye intishaar-e-dahr kya

dekhta hun main teri zulf-e-pareshan ki taraf

kya fareb-e-wada ka un ko na tha pahle KHayal

dhyan hi jata nahin ab 'ahd-o-paiman ki taraf

'shakir'-e-nadan hai dard-e-ishq hi se zindagi

dekh marne ke liye ja tu na darman ki taraf