khinch laya tujhe ehsas-e-tahaffuz mujh tak

khīñch laayā tujhe ehsās-e-tahaffuz mujh tak

ham-safar hone kā terā bhī irāda kab thā

darguzar kartī rahī terī ḳhatā.eñ barsoñ

mere jazbāt o ḳhayālāt tū samjhā kab thā

mauj-dar-mauj bhañvar khīñch rahā thā mujh ko

merī kashtī ke liye koī kināra kab thā

zāhiran saath vo mere thā magar āñkhoñ se

bad-gumānī ke naqāboñ ko utārā kab thā

tujh ko ma.alūm nahīñ apnī vafāoñ ke evaz

jān-e-jāñ maiñ ne jo chāhā thā ziyāda kab thā

do kināroñ ko milāyā thā faqat lahroñ ne

ham agar us ke na the vo bhī hamārā kab thā

us ne merī hī rifāqat ko banāyā mulzim

maiñ agar bhiiḌ meñ thī vo bhī akelā kab thā

vo tirā ahd-e-vafā yaad hai ab tak 'mītā'

bhuul baiThī huuñ mohabbat kā zamāna kab thā

khinch laya tujhe ehsas-e-tahaffuz mujh tak

ham-safar hone ka tera bhi irada kab tha

darguzar karti rahi teri KHataen barson

mere jazbaat o KHayalat tu samjha kab tha

mauj-dar-mauj bhanwar khinch raha tha mujh ko

meri kashti ke liye koi kinara kab tha

zahiran sath wo mere tha magar aankhon se

bad-gumani ke naqabon ko utara kab tha

tujh ko malum nahin apni wafaon ke ewaz

jaan-e-jaan main ne jo chaha tha ziyaada kab tha

do kinaron ko milaya tha faqat lahron ne

hum agar us ke na the wo bhi hamara kab tha

us ne meri hi rifaqat ko banaya mulzim

main agar bhiD mein thi wo bhi akela kab tha

wo tera ahd-e-wafa yaad hai ab tak 'mita'

bhul baiThi hun mohabbat ka zamana kab tha