khila khila hua chehra tera chaman ki tarah

khilā khilā huā chehra tirā chaman kī tarah

vo jism hai ki lage jism-e-sīm-tan kī tarah

na jaane kitne hasīñ haiñ mirī nigāhoñ meñ

koī badan nahīñ lekin tire badan kī tarah

jo uTh ga.e haiñ unheñ ye ḳhabar nahīñ shāyad

har anjuman to nahīñ terī anjuman kī tarah

ye belā juuhī chañbelī kī har taraf ḳhushbū

mahak rahā hai gulistāñ kisī dulhan kī tarah

tirā kamāl ki har rang tujh meñ poshīda

libās phūloñ ke haiñ tere pairahan kī tarah

vo maiñ nahīñ huuñ to phir aur kaun hai 'manzar'

vo sar se paañv tak ik shaḳhs mere fan kī tarah

khila khila hua chehra tera chaman ki tarah

wo jism hai ki lage jism-e-sim-tan ki tarah

na jaane kitne hasin hain meri nigahon mein

koi badan nahin lekin tere badan ki tarah

jo uTh gae hain unhen ye KHabar nahin shayad

har anjuman to nahin teri anjuman ki tarah

ye bela juhi chanbeli ki har taraf KHushbu

mahak raha hai gulistan kisi dulhan ki tarah

tera kamal ki har rang tujh mein poshida

libas phulon ke hain tere pairahan ki tarah

wo main nahin hun to phir aur kaun hai 'manzar'

wo sar se panw tak ek shaKHs mere fan ki tarah