KHilaf sari lakiren thin hath malte kya

ḳhilāf saarī lakīreñ thiiñ haath malte kyā

jamī thī chehre pe gard aa.ina badalte kyā

havā.eñ raah meñ Derā jamā.e baiThī thiiñ

charāġh-e-dil ko liye do-qadam bhī chalte kyā

yugoñ se jism ke andar alaav raushan hai

kisī kī aañch se mere havās jalte kyā

chalī vo āñdhī ki jañgal bhī kaañp kaañp uThā

ki ham to shāḳh se TuuTe the phir sambhalte kyā

paḌī kiran to nadī ban ga.ī pahāḌ kī barf

vo Thahre sañg zarā der meñ pighalte kyā

nadī ke donoñ kināre haiñ ās-pās magar

janam ke fāsle the qurbatoñ meñ Dhalte kyā

KHilaf sari lakiren thin hath malte kya

jami thi chehre pe gard aaina badalte kya

hawaen rah mein Dera jamae baiThi thin

charagh-e-dil ko liye do-qadam bhi chalte kya

yugon se jism ke andar alaw raushan hai

kisi ki aanch se mere hawas jalte kya

chali wo aandhi ki jangal bhi kanp kanp uTha

ki hum to shaKH se TuTe the phir sambhalte kya

paDi kiran to nadi ban gai pahaD ki barf

wo Thahre sang zara der mein pighalte kya

nadi ke donon kinare hain aas-pas magar

janam ke fasle the qurbaton mein Dhalte kya