KHilaf tha na zamana na waqt aisa tha

ḳhilāf thā na zamāna na vaqt aisā thā

jo sochiye to yahī hai nā baḳht aisā thā

bahār-rut meñ bhī shāḳhoñ ke haath ḳhālī the

khile na phuul ki mausam hī saḳht aisā thā

diye haiñ zaḳhm kuchh aise ki bhar sakeñ na kabhī

ye aur baat ki vo gul-ba-dast aisā thā

shuā-e-mehr hī aa.ī na chāñdnī utrī

maiñ kyā kahūñ ki mire dil kā dasht aisā thā

fazā-e-shām kī rangīn kar gayā hai qabā

ġhurūb-e-mehr gulāboñ ke tasht aisā thā

koī charāġh darīchoñ pe rakh ke kyā kartā

har ek samt havāoñ kā gasht aisā thā

vo chāñdnī to na thī chāñdnī ke TukḌe the

ki māhtāb mirā laḳht laḳht aisā thā

kisī safar meñ bhī bojhal hue na mere qadam

kahīñ bhī baiTh gayā sāz-o-raḳht aisā thā

palaT ke aa.e na phir kārvān-e-ahl-e-vafā

mohabbatoñ kī masāfat kā dasht aisā thā

amaan baañT rahā thā musāfiroñ meñ 'azīm'

ghanerī chhāñv luTātā daraḳht aisā thā

KHilaf tha na zamana na waqt aisa tha

jo sochiye to yahi hai na baKHt aisa tha

bahaar-rut mein bhi shaKHon ke hath KHali the

khile na phul ki mausam hi saKHt aisa tha

diye hain zaKHm kuchh aise ki bhar saken na kabhi

ye aur baat ki wo gul-ba-dast aisa tha

shua-e-mehr hi aai na chandni utri

main kya kahun ki mere dil ka dasht aisa tha

faza-e-sham ki rangin kar gaya hai qaba

ghurub-e-mehr gulabon ke tasht aisa tha

koi charagh darichon pe rakh ke kya karta

har ek samt hawaon ka gasht aisa tha

wo chandni to na thi chandni ke TukDe the

ki mahtab mera laKHt laKHt aisa tha

kisi safar mein bhi bojhal hue na mere qadam

kahin bhi baiTh gaya saz-o-raKHt aisa tha

palaT ke aae na phir karwan-e-ahl-e-wafa

mohabbaton ki masafat ka dasht aisa tha

aman banT raha tha musafiron mein 'azim'

ghaneri chhanw luTata daraKHt aisa tha