khile hain phul usi rang ki sataish mein

khile haiñ phuul usī rañg kī satā.ish meñ

jo be-misāl rahā aap apnī tābish meñ

vo ek din hī mirī zindagī kā hāsil hai

ki mere paas koī ruk gayā thā bārish meñ

bas ek jhiil hai aur peḌ kā ghanā saayā

sulag rahe haiñ ka.ī log jin kī ḳhvāhish meñ

kabhī huā jo kahīñ par ġhazal-sarā maiñ bhī

to mere yaar jale haiñ hasad kī ātish meñ

maiñ jis ko sochtā rahtā huuñ rāt-din 'ahmad'

usī ne rañg bhare haiñ mirī nigārish meñ

khile hain phul usi rang ki sataish mein

jo be-misal raha aap apni tabish mein

wo ek din hi meri zindagi ka hasil hai

ki mere pas koi ruk gaya tha barish mein

bas ek jhil hai aur peD ka ghana saya

sulag rahe hain kai log jin ki KHwahish mein

kabhi hua jo kahin par ghazal-sara main bhi

to mere yar jale hain hasad ki aatish mein

main jis ko sochta rahta hun raat-din 'ahmad'

usi ne rang bhare hain meri nigarish mein