khile jo phul to munh chhup gaya sitaron ka

khile jo phuul to muñh chhup gayā sitāroñ kā

misāl-e-abr chalā kārvāñ bahāroñ kā

na mujh se pūchh shab-e-hijr dil pe kyā guzrī

ye dekh haal hai kyā mere ġham-gusāroñ kā

na.ī bahār hañse ik nayā chaman khil jaa.e

samajh sake koī matlab agar ishāroñ kā

shab-e-siyāh ke lamhe guzār lene do

ghaḌī ghaḌī na karo zikr māh-pāroñ kā

dikhā.ī detī hai is tarah rūp-rañg kī baat

fazā meñ raqs ho jis tarah abr-pāroñ kā

huā na raah meñ haa.il koī shagūfa bhī

ravāñ-davāñ hī rahā qāfila bahāroñ kā

mujhe bhī ahl-e-jahāñ bhuul jā.eñge 'shahzād'

kise ḳhayāl hai Duube hue sitāroñ kā

khile jo phul to munh chhup gaya sitaron ka

misal-e-abr chala karwan bahaaron ka

na mujh se puchh shab-e-hijr dil pe kya guzri

ye dekh haal hai kya mere gham-gusaron ka

nai bahaar hanse ek naya chaman khil jae

samajh sake koi matlab agar ishaaron ka

shab-e-siyah ke lamhe guzar lene do

ghaDi ghaDi na karo zikr mah-paron ka

dikhai deti hai is tarah rup-rang ki baat

faza mein raqs ho jis tarah abr-paron ka

hua na rah mein hail koi shagufa bhi

rawan-dawan hi raha qafila bahaaron ka

mujhe bhi ahl-e-jahan bhul jaenge 'shahzad'

kise KHayal hai Dube hue sitaron ka