KHilqat-e-shahr to kahne ko fasane mange

ḳhilqat-e-shahr to kahne ko fasāne māñge

merī rusvā.ī ke kyā kyā na bahāne māñge

maiñ use roz na.e zaḳhm dikhā.ūñ phir bhī

dil-e-be-mehr vahī dard purāne māñge

ek āvāra-e-manzil se mohabbat kar ke

tū baḌe shahr meñ rahne ko Thikāne māñge

yād-e-māzī ke sivā paas mire kuchh bhī nahīñ

tū merī jaan vo pahle se zamāne māñge

rāt-bhar jāgte rahnā to nasīb apnā thā

sone vaalā to koī ḳhvāb suhāne māñge

dil-e-nādāñ se qanā.at kī tavaqqo.a hai kise

pā liyā un ko to kyā aur na jaane māñge

KHilqat-e-shahr to kahne ko fasane mange

meri ruswai ke kya kya na bahane mange

main use roz nae zaKHm dikhaun phir bhi

dil-e-be-mehr wahi dard purane mange

ek aawara-e-manzil se mohabbat kar ke

tu baDe shahr mein rahne ko Thikane mange

yaad-e-mazi ke siwa pas mere kuchh bhi nahin

tu meri jaan wo pahle se zamane mange

raat-bhar jagte rahna to nasib apna tha

sone wala to koi KHwab suhane mange

dil-e-nadan se qanaat ki tawaqqoa hai kise

pa liya un ko to kya aur na jaane mange