کھلتا ہے جہاں پر گل نایاب تمنا

کھلتا ہے جہاں پر گل نایاب تمنا

چھوڑ آئے ہیں اس راہ میں ہم خواب تمنا

بجھتا ہے کسی دل میں تری یاد کا سورج

روشن ہے کسی بام پہ مہتاب تمنا

سودا ہے مرے سر میں کسی اور جہاں کا

اک اور تمنا ہے پس خواب تمنا

اترے گا کبھی مجھ پہ محبت کا صحیفہ

چھیڑے گا مرے دل کو بھی مضراب تمنا

کچھ دل میں تڑپ ہے نہ مری آنکھ میں آنسو

ماتھے پہ سجا رکھی ہے محراب تمنا

پہنچیں گے ضیاؔ بارگہہ حسن میں اک روز

کھل جائے گا ہم پر بھی کبھی باب تمنا