KHiram-e-naz se shaKH-e-gulab mahw-e-amal

ḳhirām-e-nāz se shāḳh-e-gulāb mahv-e-'amal

sharābī mahv-e-nazāra sharāb mahv-e-'amal

safed-o-surḳh kañval ḳhū-e-chashm-e-dām liye

khaḌe haiñ raah meñ lekin shabāb mahv-e-'amal

asīr-e-zulf-e-girah-gīr asīr-e-raqs-o-surūr

tū mutma.in hai magar kāmyāb mahv-e-'amal

maqām ho ke makīñ ahl-e-tamkanat na hue

so aap jā.iye rahiye janāb mahv-e-'amal

hamāre dil kī ye kyā kaifiyat hai hazrat-e-'ishq

nashāt mahv-e-'amal iztirāb mahv-e-'amal

hadaf ko bhuul ga.e sāhibān-e-mushk-e-ḳhutan

pe āb-o-tāb se haiñ sab ḳharāb mahv-e-'amal

ġhazāl-e-fikr-o-firāsat bhaTak ga.e haiñ 'sa'ūd'

haqīqateñ nahīñ goyā haiñ ḳhvāb mahv-e-'amal

KHiram-e-naz se shaKH-e-gulab mahw-e-'amal

sharabi mahw-e-nazara sharab mahw-e-'amal

safed-o-surKH kanwal KHu-e-chashm-e-dam liye

khaDe hain rah mein lekin shabab mahw-e-'amal

asir-e-zulf-e-girah-gir asir-e-raqs-o-surur

tu mutmain hai magar kaamyab mahw-e-'amal

maqam ho ke makin ahl-e-tamkanat na hue

so aap jaiye rahiye janab mahw-e-'amal

hamare dil ki ye kya kaifiyat hai hazrat-e-'ishq

nashat mahw-e-'amal iztirab mahw-e-'amal

hadaf ko bhul gae sahiban-e-mushk-e-KHutan

pe aab-o-tab se hain sab KHarab mahw-e-'amal

ghazal-e-fikr-o-firasat bhaTak gae hain 'sa'ud'

haqiqaten nahin goya hain KHwab mahw-e-'amal