KHiraman shahid-e-simin badan hai

ḳhirāmāñ shāhid-e-sīmīñ badan hai

qayāmat āsmānī pairahan hai

tabassum hai ki mauj-e-nūr-o-nik.hat

nazar hai yā mohabbat kī kiran hai

mirī mastī kā andāza hai kis ko

nigāh-e-nāz merī ham-suḳhan hai

vo merī zindagī par hukmarāñ haiñ

mire bas meñ na ye tan hai na man hai

hazāroñ rañg haiñ merī nazar meñ

tasavvur meñ kisī kī anjuman hai

ḳhayāloñ meñ mire lahrā rahī haiñ

vo zulfeñ jin meñ bū-e-yāsaman hai

abhī is meñ ḳhizāñ aane na paa.e

ye nau-ras ārzūoñ kā chaman hai

kahāñ ab vo mazāq-e-sarfaroshī

zabāñ par qissa-e-dār-o-rasan hai

nahīñ badle tire 'muztar' ke andāz

vahī mastī vahī dīvāna-pan hai

KHiraman shahid-e-simin badan hai

qayamat aasmani pairahan hai

tabassum hai ki mauj-e-nur-o-nikhat

nazar hai ya mohabbat ki kiran hai

meri masti ka andaza hai kis ko

nigah-e-naz meri ham-suKHan hai

wo meri zindagi par hukmaran hain

mere bas mein na ye tan hai na man hai

hazaron rang hain meri nazar mein

tasawwur mein kisi ki anjuman hai

KHayalon mein mere lahra rahi hain

wo zulfen jin mein bu-e-yasaman hai

abhi is mein KHizan aane na pae

ye nau-ras aarzuon ka chaman hai

kahan ab wo mazaq-e-sarfaroshi

zaban par qissa-e-dar-o-rasan hai

nahin badle tere 'muztar' ke andaz

wahi masti wahi diwana-pan hai