خرد کا نور بصیرت کی روشنی لے کر

خرد کا نور بصیرت کی روشنی لے کر

جبین شوق جھکے ذوق بندگی لے کر

رہ حیات کی ظلمت ہے دو گھڑی کے لئے

وہ آ رہے ہیں محبت کی روشنی لے کر

دماغ و دل میں ابھی آپ کے اندھیرا ہے

قدم بڑھائیے کچھ ہم سے روشنی لے کر

دلوں کا بغض چھپائے سے چھپ نہیں سکتا

نہ آؤ سامنے پیغام آشتی لے کر

خزاں رسیدہ گلستاں میں دل نہیں لگتا

اب آ بھی جاؤ بہاروں کی تازگی لے کر

ہر ایک سمت ہیں بکھرے ہوئے کئی چہرے

وفور درد میں ڈوبی ہوئی ہنسی لے کر

اسے بھی ہم قد و قامت سے جان لیتے ہیں

پھرے ہے چہرہ پہ چہرہ جو آدمی لے کر

تمہاری طرح سے نازک مزاج ہم بھی ہیں

بڑھاؤ جام نہ تیور میں برہمی لے کر

یہ بونے ناپ رہے ہیں ہر ایک کے قد کو

دل و دماغ میں سودائے خود سری لے کر

اے سوزؔ بھولیں گے کیسے سخن شناس انہیں

گزر گئے جو بہار سخن وری لے کر