KHirad ka nur basirat ki raushni le kar

ḳhirad kā nuur basīrat kī raushnī le kar

jabīn-e-shauq jhuke zauq-e-bandagī le kar

rah-e-hayāt kī zulmat hai do ghaḌī ke liye

vo aa rahe haiñ mohabbat kī raushnī le kar

dimāġh-o-dil meñ abhī aap ke añdherā hai

qadam baḌhā.iye kuchh ham se raushnī le kar

diloñ kā buġhz chhupā.e se chhup nahīñ saktā

na aao sāmne paiġhām-e-āshtī le kar

ḳhizāñ-rasīda gulistāñ meñ dil nahīñ lagtā

ab aa bhī jaao bahāroñ kī tāzgī le kar

har ek samt haiñ bikhre hue ka.ī chehre

vufūr-e-dard meñ Duubī huī hañsī le kar

use bhī ham qad-o-qāmat se jaan lete haiñ

phire hai chehre pe chehra jo aadmī le kar

tumhārī tarah se nāzuk-mizāj ham bhī haiñ

baḌhāo jaam na tevar meñ barhamī le kar

ye baune naap rahe haiñ har ek ke qad ko

dil-o-dimāġh meñ saudā-e-ḳhud-sarī le kar

ai 'soz' bhūleñge kaise suḳhan-shanās unheñ

guzar ga.e jo bahār-e-suḳhan-varī le kar

KHirad ka nur basirat ki raushni le kar

jabin-e-shauq jhuke zauq-e-bandagi le kar

rah-e-hayat ki zulmat hai do ghaDi ke liye

wo aa rahe hain mohabbat ki raushni le kar

dimagh-o-dil mein abhi aap ke andhera hai

qadam baDhaiye kuchh hum se raushni le kar

dilon ka bughz chhupae se chhup nahin sakta

na aao samne paigham-e-ashti le kar

KHizan-rasida gulistan mein dil nahin lagta

ab aa bhi jao bahaaron ki tazgi le kar

har ek samt hain bikhre hue kai chehre

wufur-e-dard mein Dubi hui hansi le kar

use bhi hum qad-o-qamat se jaan lete hain

phire hai chehre pe chehra jo aadmi le kar

tumhaari tarah se nazuk-mizaj hum bhi hain

baDhao jam na tewar mein barhami le kar

ye baune nap rahe hain har ek ke qad ko

dil-o-dimagh mein sauda-e-KHud-sari le kar

ai 'soz' bhulenge kaise suKHan-shanas unhen

guzar gae jo bahaar-e-suKHan-wari le kar