KHirad ki bazm mein charcha bane hue hain hum

ḳhirad kī bazm meñ charchā bane hue haiñ ham

na jaane kab se muammā bane hue haiñ ham

hamāre haal pe hañste haiñ yuuñ jahāñ vaale

ki jaise koī tamāsha bane hue haiñ ham

sar-e-niyāz jhukā.eñ to kis taraf āḳhir

ki jab ḳhud apnā hī ka.aba bane hue haiñ ham

na hoñge ham to sitam ko karam kahegā kaun

tire sulūk kā parda bane hue haiñ ham

azal se vahm-o-gumāñ meñ hai kashmakash jaarī

ik intizār kā lamha bane hue haiñ ham

kabhī laboñ pe haiñ naġhmeñ kabhī hai mohar-e-sukūt

kabhī chaman kabhī sahrā bane hue haiñ ham

tamām chehre pe likkhī hai dāstāñ dil kī

tamām arz-e-tamannā bane hue haiñ ham

KHirad ki bazm mein charcha bane hue hain hum

na jaane kab se muamma bane hue hain hum

hamare haal pe hanste hain yun jahan wale

ki jaise koi tamasha bane hue hain hum

sar-e-niyaz jhukaen to kis taraf aaKHir

ki jab KHud apna hi kaba bane hue hain hum

na honge hum to sitam ko karam kahega kaun

tere suluk ka parda bane hue hain hum

azal se wahm-o-guman mein hai kashmakash jari

ek intizar ka lamha bane hue hain hum

kabhi labon pe hain naghmen kabhi hai mohar-e-sukut

kabhi chaman kabhi sahra bane hue hain hum

tamam chehre pe likkhi hai dastan dil ki

tamam arz-e-tamanna bane hue hain hum