KHirad ki rah se diwangi tak baat kyon pahunche

ḳhirad kī raah se dīvāngī tak baat kyoñ pahuñche

shu.ūr-e-ġham kī āshufta-sarī tak baat kyoñ pahuñche

vaqār-e-ishq kī ġham yā ḳhushī tak baat kyoñ pahuñche

hazāroñ aur bhī dil haiñ usī tak baat kyoñ pahuñche

agar dāman bache rahbar kī uljhan se to achchhā hai

ḳharāb-e-justujū kī gumrahī tak baat kyoñ pahuñche

nigāh-e-dil ke partav se kareñ shām-o-sahar raushan

mah-o-ḳhurshīd kī tābindagī tak baat kyoñ pahuñche

mohabbat kī kahānī ho ki nafrat kī hikāyat ho

kisī kī bhī sahī lekin kisī tak baat kyoñ pahuñche

nikharnā hai to nikhre apne hī ā.īne meñ fitrat

kisī ruḳh se nigāh-e-ādmī tak baat kyoñ pahuñche

mohabbat ḳhud hī hal kar le mohabbat ke muammoñ ko

ulajhne ko ḳhudī-o-be-ḳhudī tak baat kyoñ pahuñche

samo deñ haal ke dil meñ jo mustaqbil kī dhaḌkan ko

to baḌh kar is sadī se us sadī tak baat kyoñ pahuñche

sukūt-e-gul hī ā.īna banā de rāz-e-gulshan ko

'shifā' apne mazāq-e-shā.irī tak baat kyoñ pahuñche

KHirad ki rah se diwangi tak baat kyon pahunche

shuur-e-gham ki aashufta-sari tak baat kyon pahunche

waqar-e-ishq ki gham ya KHushi tak baat kyon pahunche

hazaron aur bhi dil hain usi tak baat kyon pahunche

agar daman bache rahbar ki uljhan se to achchha hai

KHarab-e-justuju ki gumrahi tak baat kyon pahunche

nigah-e-dil ke partaw se karen sham-o-sahar raushan

mah-o-KHurshid ki tabindagi tak baat kyon pahunche

mohabbat ki kahani ho ki nafrat ki hikayat ho

kisi ki bhi sahi lekin kisi tak baat kyon pahunche

nikharna hai to nikhre apne hi aaine mein fitrat

kisi ruKH se nigah-e-admi tak baat kyon pahunche

mohabbat KHud hi hal kar le mohabbat ke muammon ko

ulajhne ko KHudi-o-be-KHudi tak baat kyon pahunche

samo den haal ke dil mein jo mustaqbil ki dhaDkan ko

to baDh kar is sadi se us sadi tak baat kyon pahunche

sukut-e-gul hi aaina bana de raaz-e-gulshan ko

'shifa' apne mazaq-e-shairi tak baat kyon pahunche