خرد کی زد میں اگر گلستاں بھی آتا ہے

خرد کی زد میں اگر گلستاں بھی آتا ہے

یقین عالم وہم گماں بھی آتا ہے

گواہ غنچہ و گل ہیں بہار کا موسم

مرے چمن میں برنگ خزاں بھی آتا ہے

ترے حضور ہے گویا مرے لبوں کا سکوت

نگاہ عشق کو حسن بیاں بھی آتا ہے

مرے سلگنے کا احوال سننے والوں کو

جو اٹھ رہا ہے نظر وہ دھواں بھی آتا ہے

نگاہ پڑتی ہے جب زخم ہائے دل پہ مجھے

خیال مہر و مہ و کہکشاں بھی آتا ہے

نقوش سجدہ اسی راہ کا مقدر ہیں

وہ راہ جس میں ترا آستاں بھی آتا ہے

میں نام بھول رہا ہوں مگر کوئی نشترؔ

مجھے سنانے مری داستاں بھی آتا ہے