KHirad ki zad mein agar gulsitan bhi aata hai

ḳhirad kī zad meñ agar gulsitāñ bhī aatā hai

yaqīn-e-ālam-e-vahm-e-gumāñ bhī aatā hai

gavāh ġhuncha-o-gul haiñ bahār kā mausam

mire chaman meñ ba-rañg-e-ḳhizāñ bhī aatā hai

tire huzūr hai goyā mire laboñ kā sukūt

nigāh-e-ishq ko husn-e-bayāñ bhī aatā hai

mire sulagne kā ahvāl sunñe vāloñ ko

jo uTh rahā hai nazar vo dhuāñ bhī aatā hai

nigāh paḌtī hai jab zaḳhm-hā-e-dil pe mujhe

ḳhayāl-e-mehr-o-mah-o-kahkashāñ bhī aatā hai

nuqūsh-e-sajda usī raah kā muqaddar haiñ

vo raah jis meñ tirā āstāñ bhī aatā hai

maiñ naam bhuul rahā huuñ magar koī 'nashtar'

mujhe sunāne mirī dāstāñ bhī aatā hai

KHirad ki zad mein agar gulsitan bhi aata hai

yaqin-e-alam-e-wahm-e-guman bhi aata hai

gawah ghuncha-o-gul hain bahaar ka mausam

mere chaman mein ba-rang-e-KHizan bhi aata hai

tere huzur hai goya mere labon ka sukut

nigah-e-ishq ko husn-e-bayan bhi aata hai

mere sulagne ka ahwal sunne walon ko

jo uTh raha hai nazar wo dhuan bhi aata hai

nigah paDti hai jab zaKHm-ha-e-dil pe mujhe

KHayal-e-mehr-o-mah-o-kahkashan bhi aata hai

nuqush-e-sajda usi rah ka muqaddar hain

wo rah jis mein tera aastan bhi aata hai

main nam bhul raha hun magar koi 'nashtar'

mujhe sunane meri dastan bhi aata hai