KHirad ko gumshuda-e-ku-ba-ku samajhte hain

ḳhirad ko gumshuda-e-kū-ba-kū samajhte haiñ

ham ahl-e-ishq tujhe rū-ba-rū samajhte haiñ

tire ḳhayāl kī ḳhushbū tire jamāl kā rañg

har ik ko takmila-e-rañg-o-bū samajhte haiñ

koī maqām koī marhala nazar meñ nahīñ

kahāñ hai qāfila-e-ārzū samajhte haiñ

butān-e-shahr ko ye e'tirāf ho ki na ho

zabān-e-ishq kī sab guftugū samajhte haiñ

hazār fitna dar āġhosh hai sukūñ terā

tujhe ham ai dil-e-āshufta-ḳhū samajhte haiñ

hazār manzil-e-nau yak farāġh-e-gumshudagī

ma.āl-e-hausla-e-justujū samajhte haiñ

faqīh-e-shahr se kyā pūchhiye 'ravish' ki janāb

zabān-e-shīsha-o-jām-o-subū samajhte haiñ

KHirad ko gumshuda-e-ku-ba-ku samajhte hain

hum ahl-e-ishq tujhe ru-ba-ru samajhte hain

tere KHayal ki KHushbu tere jamal ka rang

har ek ko takmila-e-rang-o-bu samajhte hain

koi maqam koi marhala nazar mein nahin

kahan hai qafila-e-arzu samajhte hain

butan-e-shahr ko ye e'tiraf ho ki na ho

zaban-e-ishq ki sab guftugu samajhte hain

hazar fitna dar aaghosh hai sukun tera

tujhe hum ai dil-e-ashufta-KHu samajhte hain

hazar manzil-e-nau yak faragh-e-gumshudagi

maal-e-hausla-e-justuju samajhte hain

faqih-e-shahr se kya puchhiye 'rawish' ki janab

zaban-e-shisha-o-jam-o-subu samajhte hain