KHirad ne lakh sar-o-barg-e-ijtinab kiya

ḳhirad ne laakh sar-o-barg-e-ijtināb kiyā

tirī nigah ko mire dil ne kāmyāb kiyā

karam bhī tū ne jo ai āsmāñ-janāb kiyā

sukūn-e-dil ko mubaddal-ba-iztirāb kiyā

nisār us nigah-e-dil-navāz ke jis ne

asīr-e-dard kiyā vaqf-e-iztirāb kiyā

mujhe tirī nigah-e-intiḳhāb par hai ye rashk

jahān bhar se mujhe us ne intiḳhāb kiyā

dil-e-hazīñ gila-e-jaur us se jis ne tujhe

harīm-e-ishq-o-mohabbat meñ bāryāb kiyā

karam nahīñ na sahī jaur-e-nā-ravā hī sahī

ye kam nahīñ ki mujhe tū ne intiḳhāb kiyā

nigāh-e-shauq kī gustāḳhiyāñ ma.āz-allāh

kise harīm-e-tasavvur meñ be-naqāb kiyā

'rashīd' ishq kisī haal meñ gunāh nahīñ

chalo gunāh sahī ab to irtikāb kiyā

KHirad ne lakh sar-o-barg-e-ijtinab kiya

teri nigah ko mere dil ne kaamyab kiya

karam bhi tu ne jo ai aasman-janab kiya

sukun-e-dil ko mubaddal-ba-iztirab kiya

nisar us nigah-e-dil-nawaz ke jis ne

asir-e-dard kiya waqf-e-iztirab kiya

mujhe teri nigah-e-intiKHab par hai ye rashk

jahan bhar se mujhe us ne intiKHab kiya

dil-e-hazin gila-e-jaur us se jis ne tujhe

harim-e-ishq-o-mohabbat mein baryab kiya

karam nahin na sahi jaur-e-na-rawa hi sahi

ye kam nahin ki mujhe tu ne intiKHab kiya

nigah-e-shauq ki gustaKHiyan maaz-allah

kise harim-e-tasawwur mein be-naqab kiya

'rashid' ishq kisi haal mein gunah nahin

chalo gunah sahi ab to irtikab kiya