خرد سے ایسے الجھے ہیں کہ سلجھائے نہیں جاتے

خرد سے ایسے الجھے ہیں کہ سلجھائے نہیں جاتے

جہاں میں ہم سے دیوانے کہیں پائے نہیں جاتے

ہمارا اور گلوں کا رنگ وحشت ایک جیسا ہے

نکل جاتے ہیں یوں دامن کہ سلوائے نہیں جاتے

بغیر ان کے بسا اوقات یہ محسوس ہوتا ہے

کہ جیسے ہم دو عالم میں کہیں پائے نہیں جاتے

سکوں کی جستجو آسودگی کی آرزؤں نے

قدم ایسے نکالے ہیں کہ ٹھہرائے نہیں جاتے

تری مخمور آنکھوں میں ترے گل رنگ ہونٹوں پر

ہزاروں گیت ایسے بھی ہیں جو گائے نہیں جاتے

خوشی کی چھاؤں میں بیٹھے غموں کی دھوپ بھی جھیلی

خیالوں سے تری دیوار کے سائے نہیں جاتے

ہماری تشنگی کی شرم رکھ لے ساقئ محفل

بھری محفل میں ہم سے ہاتھ پھیلائے نہیں جاتے

چلو خود ہی ادیبؔ اس بزم میں تم بھی کہ پروانے

حضور شمع خود جاتے ہیں بلوائے نہیں جاتے