KHirad se aise uljhe hain ki suljhae nahin jate

ḳhirad se aise uljhe haiñ ki suljhā.e nahīñ jaate

jahāñ meñ ham se dīvāne kahīñ paa.e nahīñ jaate

hamārā aur guloñ kā rang-e-vahshat ek jaisā hai

nikal jaate haiñ yuuñ dāman ki silvā.e nahīñ jaate

baġhair un ke basā-auqāt ye mahsūs hotā hai

ki jaise ham do 'ālam meñ kahīñ paa.e nahīñ jaate

sukūñ kī justujū āsūdgī kī ārzūoñ ne

qadam aise nikāle haiñ ki Thahrā.e nahīñ jaate

tirī maḳhmūr āñkhoñ meñ tire gul-rang hoñToñ par

hazāroñ giit aise bhī haiñ jo gaa.e nahīñ jaate

ḳhushī kī chhāñv meñ baiThe ġhamoñ kī dhuup bhī jhelī

ḳhayāloñ se tirī dīvār ke saa.e nahīñ jaate

hamārī tishnagī kī sharm rakh le sāqi-e-mahfil

bharī mahfil meñ ham se haath phailā.e nahīñ jaate

chalo ḳhud hī 'adīb' us bazm meñ tum bhī ki parvāne

huzūr-e-sham’ ḳhud jaate haiñ bulvā.e nahīñ jaate

KHirad se aise uljhe hain ki suljhae nahin jate

jahan mein hum se diwane kahin pae nahin jate

hamara aur gulon ka rang-e-wahshat ek jaisa hai

nikal jate hain yun daman ki silwae nahin jate

baghair un ke basa-auqat ye mahsus hota hai

ki jaise hum do 'alam mein kahin pae nahin jate

sukun ki justuju aasudgi ki aarzuon ne

qadam aise nikale hain ki Thahrae nahin jate

teri maKHmur aankhon mein tere gul-rang honTon par

hazaron git aise bhi hain jo gae nahin jate

KHushi ki chhanw mein baiThe ghamon ki dhup bhi jheli

KHayalon se teri diwar ke sae nahin jate

hamari tishnagi ki sharm rakh le saqi-e-mahfil

bhari mahfil mein hum se hath phailae nahin jate

chalo KHud hi 'adib' us bazm mein tum bhi ki parwane

huzur-e-sham’ KHud jate hain bulwae nahin jate