KHirad se dur gham-e-tund-KHu mein achchhe the

ḳhirad se duur ġham-e-tund-ḳhū meñ achchhe the

isī junūñ meñ isī hāv-hū meñ achchhe the

nikal ke aap se bāhar ḳharāb-o-ḳhvār hue

mudām-e-ġharq ham apne lahū meñ achchhe the

ġhurūr-e-zohd se ranj-e-gunāh behtar thā

ḳharāb shaġhl sharāb-o-subū meñ achchhe the

vo rā.egāñ bhī agar thī to rā.egāñ na kaho

ki roz-o-shab mire is justujū meñ achchhe the

agarche vo bhī na the hasb-e-ārzū lekin

vo din kaTe jo tirī aarzū meñ achchhe the

havā huī hai muāfiq hameñ vahīñ le chal

safīna-rāañ ham isī aabjū meñ achchhe the

KHirad se dur gham-e-tund-KHu mein achchhe the

isi junun mein isi haw-hu mein achchhe the

nikal ke aap se bahar KHarab-o-KHwar hue

mudam-e-gharq hum apne lahu mein achchhe the

ghurur-e-zohd se ranj-e-gunah behtar tha

KHarab shaghl sharab-o-subu mein achchhe the

wo raegan bhi agar thi to raegan na kaho

ki roz-o-shab mere is justuju mein achchhe the

agarche wo bhi na the hasb-e-arzu lekin

wo din kaTe jo teri aarzu mein achchhe the

hawa hui hai muafiq hamein wahin le chal

safina-raan hum isi aabju mein achchhe the