KHirad wala bhi apne aap se begana aata hai

ḳhirad vaalā bhī apne aap se begāna aatā hai

jo un kī bazm se aatā hai vo dīvāna aatā hai

na josh-e-mai na kaif-e-naġhma-e-rindāna aatā hai

ik aisā vaqt bhī ai sāqi-e-mai-ḳhāna aatā hai

bayān-e-dard dil ko vā.iz-e-farzāna aatā hai

vo kyā jaane haqīqat us ko to afsāna aatā hai

maiñ chaltā to huuñ ghar se jānib-e-masjid magar nāseh

qadam ruk jaate haiñ raste meñ jab mai-ḳhāna aatā hai

ḳhirad vāloñ se jab hal mas.aloñ ke ho nahīñ paate

to phir is kaam kī ḳhātir koī dīvāna aatā hai

bahut mushkil hai in se bach ke rūdād-e-alam kahnā

ki afsāne se pahle sāhab-e-afsāna aatā hai

na jaane kaun sī lazzat hai is sozish meñ ai 'āsī'

ki pesh-e-sham.a jalne ke liye parvāna aatā hai

KHirad wala bhi apne aap se begana aata hai

jo un ki bazm se aata hai wo diwana aata hai

na josh-e-mai na kaif-e-naghma-e-rindana aata hai

ek aisa waqt bhi ai saqi-e-mai-KHana aata hai

bayan-e-dard dil ko waiz-e-farzana aata hai

wo kya jaane haqiqat us ko to afsana aata hai

main chalta to hun ghar se jaanib-e-masjid magar naseh

qadam ruk jate hain raste mein jab mai-KHana aata hai

KHirad walon se jab hal masalon ke ho nahin pate

to phir is kaam ki KHatir koi diwana aata hai

bahut mushkil hai in se bach ke rudad-e-alam kahna

ki afsane se pahle sahab-e-afsana aata hai

na jaane kaun si lazzat hai is sozish mein ai 'asi'

ki pesh-e-shama jalne ke liye parwana aata hai