KHirman-e-jaan ke liye KHud hi sharar ho gae hum

ḳhirman-e-jāñ ke liye ḳhud hī sharar ho ga.e ham

ḳhāksārī jo baḌhī ḳhāk-basar ho ga.e ham

apne hone kā yaqīñ aa gayā bujhte bujhte

be-karāñ shab meñ jo imkān-e-sahar ho ga.e ham

nā-murādī meñ nashāt-e-ġham imkāñ thā ajab

ham kabhī shaad na ho paate magar ho ga.e ham

ham nahīñ kuchh bhī magar mārka-e-ishq kī ḳhair

jiit maqsūm huī us kī jidhar ho ga.e ham

jāda-e-ishq tirā haq to adā kis se huā

ḳhair itnā hai ki āġhāz-e-safar ho ga.e ham

zindagī aise guzārī ki subuk sar na hue

yaanī is daur meñ jiine kā hunar ho ga.e ham

tesha bhī ham the yaqīñ ham the to zindāñ kyā chiiz

yahī honā thā so dīvār meñ dar ho ga.e ham

dast-e-qudrat hameñ kuchh aur hai banñā so banā

chhoḌ ye zikr ki qatre se guhar ho ga.e ham

KHirman-e-jaan ke liye KHud hi sharar ho gae hum

KHaksari jo baDhi KHak-basar ho gae hum

apne hone ka yaqin aa gaya bujhte bujhte

be-karan shab mein jo imkan-e-sahar ho gae hum

na-muradi mein nashat-e-gham imkan tha ajab

hum kabhi shad na ho pate magar ho gae hum

hum nahin kuchh bhi magar marka-e-ishq ki KHair

jit maqsum hui us ki jidhar ho gae hum

jada-e-ishq tera haq to ada kis se hua

KHair itna hai ki aaghaz-e-safar ho gae hum

zindagi aise guzari ki subuk sar na hue

yani is daur mein jine ka hunar ho gae hum

tesha bhi hum the yaqin hum the to zindan kya chiz

yahi hona tha so diwar mein dar ho gae hum

dast-e-qudrat hamein kuchh aur hai banna so bana

chhoD ye zikr ki qatre se guhar ho gae hum