KHizan bahaar ka unwan hai dekhiye kya ho

ḳhizāñ bahār kā 'unvāñ hai dekhiye kyā ho

qafas kā naam gulistāñ hai dekhiye kyā ho

numūd-e-sub.h-e-bahārāñ hai dekhiye kyā ho

abhī se chaak garebāñ hai dekhiye kyā ho

na ārzū-e-haram hai na but-kade kā ḳhayāl

vo shoḳh hāsil-e-īmāñ hai dekhiye kyā ho

lagī huī hai chaman meñ ik aag sī har-sū

bahār sho'la-ba-dāmāñ hai dekhiye kyā ho

jahān-e-'ishq meñ dā'vā thā zabt kā jis ko

vo aaj chāk-garebāñ hai dekhiye kyā ho

na vo hayāt ke āsār haiñ na vo raunaq

udaas sham’-e-shabistāñ hai dekhiye kyā ho

sunā ye hai ki mire ghar phir aa rahā hai koī

hayāt aaj ġhazal-ḳhvāñ hai dekhiye kyā ho

abhī ġhurūb kahāñ āftāb-e-jaur huā

abhī se jashn-e-charāġhāñ hai dekhiye kyā ho

kisī tarah bhī 'tabassum' ko ab qarār nahīñ

hayāt sar-ba-garebāñ hai dekhiye kyā ho

KHizan bahaar ka 'unwan hai dekhiye kya ho

qafas ka nam gulistan hai dekhiye kya ho

numud-e-subh-e-bahaaran hai dekhiye kya ho

abhi se chaak gareban hai dekhiye kya ho

na aarzu-e-haram hai na but-kade ka KHayal

wo shoKH hasil-e-iman hai dekhiye kya ho

lagi hui hai chaman mein ek aag si har-su

bahaar sho'la-ba-daman hai dekhiye kya ho

jahan-e-'ishq mein da'wa tha zabt ka jis ko

wo aaj chaak-gareban hai dekhiye kya ho

na wo hayat ke aasar hain na wo raunaq

udas sham’-e-shabistan hai dekhiye kya ho

suna ye hai ki mere ghar phir aa raha hai koi

hayat aaj ghazal-KHwan hai dekhiye kya ho

abhi ghurub kahan aaftab-e-jaur hua

abhi se jashn-e-charaghan hai dekhiye kya ho

kisi tarah bhi 'tabassum' ko ab qarar nahin

hayat sar-ba-gareban hai dekhiye kya ho