KHizan chaman mein yun mastana-war guzri hai

ḳhizāñ chaman meñ yuuñ mastānā-vār guzrī hai

gumāñ ye hotā hai jaise bahār guzrī hai

fazā udaas galī muzmahil chaman pāmāl

bahār ab ke ḳhizāñ darkinār guzrī hai

abhī vahī kahīñ guzre na hoñ udhar ho kar

shamīm-bez havā itr-bār guzrī hai

zahe tasavvur-e-jānāñ zahe ḳhayāl-e-jamāl

har ek saañs mirī mushk-bār guzrī hai

tire karam se hamesha rahā hai dil shādāb

mire chaman se hamesha bahār guzrī hai

lubhā sakegī mujhe kyā kisī kī ra.anā.ī

mirī nazar se tumhārī bahār guzrī hai

ināyat aap kī vaj.h-e-sukūñ to hai lekin

maiñ kyā karūñ ki tabī.at pe baar guzrī hai

guzar rahī hai 'mubārak' guzar hī jā.egī

vo zindagī jo bahut nāgavār guzrī hai

KHizan chaman mein yun mastana-war guzri hai

guman ye hota hai jaise bahaar guzri hai

faza udas gali muzmahil chaman pamal

bahaar ab ke KHizan darkinar guzri hai

abhi wahi kahin guzre na hon udhar ho kar

shamim-bez hawa itr-bar guzri hai

zahe tasawwur-e-jaanan zahe KHayal-e-jamal

har ek sans meri mushk-bar guzri hai

tere karam se hamesha raha hai dil shadab

mere chaman se hamesha bahaar guzri hai

lubha sakegi mujhe kya kisi ki ranai

meri nazar se tumhaari bahaar guzri hai

inayat aap ki wajh-e-sukun to hai lekin

main kya karun ki tabiat pe bar guzri hai

guzar rahi hai 'mubarak' guzar hi jaegi

wo zindagi jo bahut nagawar guzri hai