KHizan ka pyas ka mahrumi-e-bahaar ka dukh

ḳhizāñ kā pyaas kā mahrūmī-e-bahār kā dukh

athāh ret meñ phailā hai regzār kā dukh

darīda-tan huuñ thakan se ki ab to jaatā rahā

qabā-e-chāk-o-garebān-e-tār-tār kā dukh

mirī ġhazal kī alāmat faqat ye do misre

visāl-e-yār kā imkāñ firāq-e-yār kā dukh

adhūrī baazī kā itnā sā sukh to hai ki mujhe

kisī kī jiit kā ġham hai na apnī haar kā dukh

hai dhaḌkanoñ kī jagah dil meñ terī yaad kī chaap

bajā.e niiñd hai āñkhoñ meñ intizār kā dukh

KHizan ka pyas ka mahrumi-e-bahaar ka dukh

athah ret mein phaila hai regzar ka dukh

darida-tan hun thakan se ki ab to jata raha

qaba-e-chaak-o-gareban-e-tar-tar ka dukh

meri ghazal ki alamat faqat ye do misre

visal-e-yar ka imkan firaq-e-yar ka dukh

adhuri bazi ka itna sa sukh to hai ki mujhe

kisi ki jit ka gham hai na apni haar ka dukh

hai dhaDkanon ki jagah dil mein teri yaad ki chap

bajae nind hai aankhon mein intizar ka dukh