KHizan ki baat na zikr-e-bahaar karte hain

ḳhizāñ kī baat na zikr-e-bahār karte haiñ

to log kaise ġhamoñ kā shumār karte haiñ

ye ahl-e-shahr jise ḳhāksār karte haiñ

bagūla kah ke use be-viqār karte haiñ

abhī hameñ kisī manzil kī justujū hī nahīñ

safar barā.e-safar iḳhtiyār karte haiñ

ye kis ke vasl kī ḳhushbū hai rahguzāroñ meñ

ki log shām-o-sahar intizār karte haiñ

agarche bār-e-samā.at haiñ shab ke sannāTe

koī sune to use hoshiyār karte haiñ

kuchh aur sham.eñ jalānā paḌeñgī mahfil meñ

abhī añdhere ujāloñ pe vaar karte haiñ

hameñ bhī 'rashk' duāoñ se mudda.ā mil jaa.e

yahī duā hai jo ham baar baar karte haiñ

KHizan ki baat na zikr-e-bahaar karte hain

to log kaise ghamon ka shumar karte hain

ye ahl-e-shahr jise KHaksar karte hain

bagula kah ke use be-wiqar karte hain

abhi hamein kisi manzil ki justuju hi nahin

safar barae-safar iKHtiyar karte hain

ye kis ke wasl ki KHushbu hai rahguzaron mein

ki log sham-o-sahar intizar karte hain

agarche bar-e-samaat hain shab ke sannaTe

koi sune to use hoshiyar karte hain

kuchh aur shamen jalana paDengi mahfil mein

abhi andhere ujalon pe war karte hain

hamein bhi 'rashk' duaon se muddaa mil jae

yahi dua hai jo hum bar bar karte hain