KHizan-nasib chaman ki bahaar hai ki nahin

ḳhizāñ-nasīb chaman kī bahār hai ki nahīñ

qabā-e-ġhuncha-o-gul tār-tār hai ki nahīñ

ġham-e-hayāt ġham-e-ishq aur ġham-e-daurāñ

kisī ko duniyā meñ in se farār hai ki nahīñ

rah-e-hayāt meñ aksar gumāñ ye guzrā hai

mirī vafā kā unheñ e.atibār hai ki nahīñ

baḌe tapāk se dil ne ye ham se pūchhā hai

koī hamārī tarah be-qarār hai ki nahīñ

ġham-e-hayāt se jis ko farār mil na sakā

qarār se vahī zer-e-mazār hai ki nahīñ

koī bhī sach ke sivā jhuuT boltā hī nahīñ

ye sāneha hai tumheñ e.atibār hai ki nahīñ

tazād hī pe ho buniyād jis hukūmat kī

har e.atibār se nā-pā.edār hai ki nahīñ

tumhārī firqa-parastāna zehniyat kī qasam

tamām arz-e-vatan sho.ala-bār hai ki nahīñ

ye eqtidār ke bhūkoñ se pūchhnā hai 'tarab'

tumhāre dam se vatan zer-e-bār hai ki nahīñ

KHizan-nasib chaman ki bahaar hai ki nahin

qaba-e-ghuncha-o-gul tar-tar hai ki nahin

gham-e-hayat gham-e-ishq aur gham-e-dauran

kisi ko duniya mein in se farar hai ki nahin

rah-e-hayat mein aksar guman ye guzra hai

meri wafa ka unhen eatibar hai ki nahin

baDe tapak se dil ne ye hum se puchha hai

koi hamari tarah be-qarar hai ki nahin

gham-e-hayat se jis ko farar mil na saka

qarar se wahi zer-e-mazar hai ki nahin

koi bhi sach ke siwa jhuT bolta hi nahin

ye saneha hai tumhein eatibar hai ki nahin

tazad hi pe ho buniyaad jis hukumat ki

har eatibar se na-paedar hai ki nahin

tumhaari firqa-parastana zehniyat ki qasam

tamam arz-e-watan shoala-bar hai ki nahin

ye eqtidar ke bhukon se puchhna hai 'tarab'

tumhaare dam se watan zer-e-bar hai ki nahin