KHizan ne ujaDe chaman kaise kaise

ḳhizāñ ne ujāḌe chaman kaise kaise

hue ḳhaak sarv-o-saman kaise kaise

mile ḳhaak meñ dast-e-jaur-e-ḳhizāñ se

gul-o-lāla-o-nastaran kaise kaise

dikhā.e haiñ saudā-e-zulf-e-butāñ ne

hameñ bhī ḳhatā-o-ḳhutan kaise kaise

tire hijr meñ mil ga.e ham ko monis

ġham-o-ranj-o-dard-o-mehan kaise kaise

kabhī ho kisī ke kabhī ho kisī ke

badalte ho sāhab chalan kaise kaise

mire but se bhī koī miltā hai dekhūñ

tire but haiñ ai barhaman kaise kaise

na 'mahrūm' tū tab-e-mauzūñ pe utrā

haiñ maujūd ahl-e-suḳhan kaise kaise

KHizan ne ujaDe chaman kaise kaise

hue KHak sarw-o-saman kaise kaise

mile KHak mein dast-e-jaur-e-KHizan se

gul-o-lala-o-nastaran kaise kaise

dikhae hain sauda-e-zulf-e-butan ne

hamein bhi KHata-o-KHutan kaise kaise

tere hijr mein mil gae hum ko monis

gham-o-ranj-o-dard-o-mehan kaise kaise

kabhi ho kisi ke kabhi ho kisi ke

badalte ho sahab chalan kaise kaise

mere but se bhi koi milta hai dekhun

tere but hain ai barhaman kaise kaise

na 'mahrum' tu tab-e-mauzun pe utra

hain maujud ahl-e-suKHan kaise kaise