KHizan-rasida hain ab tak meri bahaar ke din

ḳhizāñ-rasīda haiñ ab tak mirī bahār ke din

tire baġhair mayassar nahīñ qarār ke din

jidhar bhī dekhiye sho.ale dikhā.ī dete haiñ

chaman meñ raas na aa.e hameñ bahār ke din

vo bāda-ḳhez nigāhoñ kī juñbisheñ tauba

mile the mujh ko bhī ye mastī-o-ḳhumār ke din

ḳhizāñ bhī aa.egī ik din ye baat lāzim hai

guzār lete mire saath tum bahār ke din

ye aur baat hai qismat palaT ga.ī merī

mujhe haiñ yaad abhī tak tumhāre pyaar ke din

hameñ to yaad hī un kī rulātī rahtī hai

tumhāre saath guzāre the jo qarār ke din

taḌaptā chhoḌ ke 'iqbāl' ko na jaao tum

kaTeñge kaise bhalā is se intizār ke din

KHizan-rasida hain ab tak meri bahaar ke din

tere baghair mayassar nahin qarar ke din

jidhar bhi dekhiye shoale dikhai dete hain

chaman mein ras na aae hamein bahaar ke din

wo baada-KHez nigahon ki junbishen tauba

mile the mujh ko bhi ye masti-o-KHumar ke din

KHizan bhi aaegi ek din ye baat lazim hai

guzar lete mere sath tum bahaar ke din

ye aur baat hai qismat palaT gai meri

mujhe hain yaad abhi tak tumhaare pyar ke din

hamein to yaad hi un ki rulati rahti hai

tumhaare sath guzare the jo qarar ke din

taDapta chhoD ke 'iqbaal' ko na jao tum

kaTenge kaise bhala is se intizar ke din