KHizan se kaun si shai chhin li bahaaron ne

ḳhizāñ se kaun sī shai chhīn lī bahāroñ ne

guloñ ko aañkh dikhā.ī chaman meñ ḳhāroñ ne

chhupā chhupā ke rakhā thā jise bahāroñ ne

ugal diyā hai vahī ḳhuun lāla-zāroñ ne

qadam qadam pe hazāroñ fareb haiñ saaqī

irāde nek to bāñdhe haiñ bāda-ḳhvāroñ ne

usī maqām pe pahuñche haiñ tere dīvāne

jahāñ se aañkh churā.ī thī hoshyāroñ ne

mire jamāl kā har aa.ina ubhar aayā

ye saaz kaun se chheḌe haiñ ābshāroñ ne

qadam qadam pe tajallī nazar nazar jalva

kahāñ bulāyā hai muusā ko kohsāroñ ne

shab-e-firāq umīdoñ kī lau bhī kaañp uThī

kuchh aise giit bhī gaa.e haiñ chāñd tāroñ ne

umīd-o-bīm ke ā.īne muttasil rakh kar

hayāt-e-nau mujhe baḳhshī tire sahāroñ ne

ye ittifāq hai in ko vafā na raas aa.ī

bahāyā ḳhuun jigar tere jāñ-nisāroñ ne

duā hai phir bhī salāmat rahe ye mai-ḳhāna

evaz meñ mai ke piyā ḳhuun bāda-ḳhvāroñ ne

sukūñ kī bhiik to māñgī na thī kabhī maiñ ne

karam kiyā hai kahāñ mere ġham-gusāroñ ne

chubho diye haiñ diloñ meñ jo ḳhār-e-ġham tum ne

unhīñ se zaḳhm kurede vafā-shi.āroñ ne

kahāñ kā zauq-e-nazar ḳhud nazar hai gum 'fā.iq'

chhupā liyā hai mujhe yuuñ tire nazāroñ ne

KHizan se kaun si shai chhin li bahaaron ne

gulon ko aankh dikhai chaman mein KHaron ne

chhupa chhupa ke rakha tha jise bahaaron ne

ugal diya hai wahi KHun lala-zaron ne

qadam qadam pe hazaron fareb hain saqi

irade nek to bandhe hain baada-KHwaron ne

usi maqam pe pahunche hain tere diwane

jahan se aankh churai thi hoshyaron ne

mere jamal ka har aaina ubhar aaya

ye saz kaun se chheDe hain aabshaaron ne

qadam qadam pe tajalli nazar nazar jalwa

kahan bulaya hai musa ko kohsaron ne

shab-e-firaq umidon ki lau bhi kanp uThi

kuchh aise git bhi gae hain chand taron ne

umid-o-bim ke aaine muttasil rakh kar

hayat-e-nau mujhe baKHshi tere sahaaron ne

ye ittifaq hai in ko wafa na ras aai

bahaya KHun jigar tere jaan-nisaron ne

dua hai phir bhi salamat rahe ye mai-KHana

ewaz mein mai ke piya KHun baada-KHwaron ne

sukun ki bhik to mangi na thi kabhi main ne

karam kiya hai kahan mere gham-gusaron ne

chubho diye hain dilon mein jo KHar-e-gham tum ne

unhin se zaKHm kurede wafa-shiaron ne

kahan ka zauq-e-nazar KHud nazar hai gum 'faiq'

chhupa liya hai mujhe yun tere nazaron ne