KHizr jis se bane us aab-e-baqa se Dariye

ḳhizr jis se bane us āb-e-baqā se Dariye

lambī umroñ se buzurgoñ kī duā se Dariye

ham-qadam ban ga.e us ke to Thikāna hī nahīñ

aatī jaatī huī be-samt havā se Dariye

niyyat-e-jurm hī hai jurm kā āġhāz yahāñ

jo na kī ho usī nā-karda ḳhatā se Dariye

sāneha rūnumā ho jā.egā shaq hone par

teshe ko rokiye patthar kī anā se Dariye

pattā pattā yahāñ baiThā hai sameTe ḳhud ko

gungunātī huī is bād-e-sabā se Dariye

aur shai haiñ to koī Darne kī hājat hī nahīñ

aap bande haiñ ḳhudā ke to ḳhudā se Dariye

rahmateñ zahmateñ ban jaatī haiñ aksar ai 'aah'

ho na ye sail-e-balā kaalī ghaTā se Dariye

KHizr jis se bane us aab-e-baqa se Dariye

lambi umron se buzurgon ki dua se Dariye

ham-qadam ban gae us ke to Thikana hi nahin

aati jati hui be-samt hawa se Dariye

niyyat-e-jurm hi hai jurm ka aaghaz yahan

jo na ki ho usi na-karda KHata se Dariye

saneha runuma ho jaega shaq hone par

teshe ko rokiye patthar ki ana se Dariye

patta patta yahan baiTha hai sameTe KHud ko

gungunati hui is baad-e-saba se Dariye

aur shai hain to koi Darne ki hajat hi nahin

aap bande hain KHuda ke to KHuda se Dariye

rahmaten zahmaten ban jati hain aksar ai 'ah'

ho na ye sail-e-bala kali ghaTa se Dariye