kho diya hai ek aisa aadmi

kho diyā hai ek aisā aadmī

sab jise kahte the achchhā aadmī

apne hāthoñ se gañvā kar dosto

DhūñDne nikle haiñ apnā aadmī

jhaḌ ga.e patte parinde uḌ ga.e

jis shajar par maiñ ne likkhā aadmī

ek hī fitna uThā.egā miyāñ

āḳhirī kyā aur pahlā aadmī

muskurāhaT ne tirī dhoka diyā

aur hamāre dil se utrā aadmī

aa gayā hai jo mirī dahlīz par

lag rahā hai dekhā dekhā aadmī

vo ġhamoñ ke vāste tiryāk thā

sab jise kahte the kaḌvā aadmī

bain kartī phir rahī hai zindagī

aadmī kā hai sahārā aadmī

kyā 'adīm' uftād sar par aa paḌī

ghar se ḳhālī haath niklā aadmī

kho diya hai ek aisa aadmi

sab jise kahte the achchha aadmi

apne hathon se ganwa kar dosto

DhunDne nikle hain apna aadmi

jhaD gae patte parinde uD gae

jis shajar par main ne likkha aadmi

ek hi fitna uThaega miyan

aaKHiri kya aur pahla aadmi

muskurahaT ne teri dhoka diya

aur hamare dil se utra aadmi

aa gaya hai jo meri dahliz par

lag raha hai dekha dekha aadmi

wo ghamon ke waste tiryak tha

sab jise kahte the kaDwa aadmi

bain karti phir rahi hai zindagi

aadmi ka hai sahaara aadmi

kya 'adim' uftad sar par aa paDi

ghar se KHali hath nikla aadmi