kho diya maine zarurat ke safar se kya kya

kho diyā maiñ ne zarūrat ke safar se kyā kyā

ab kahūñ kis se gayā hai mire ghar se kyā kyā

ek ham hī haiñ tahī-dast yahāñ se lauTe

varna paayā hai sabhī ne tire dar se kyā kyā

zālimo ham hī nahīñ tum bhī yahīñ dekhoge

le ke lauTegī duā bāb-e-asar se kyā kyā

tum to masrūf rahe aag hī bhaḌkāne meñ

jal gayā siine meñ us soz-e-jigar se kyā kyā

pheñk kar sang rahe tum to salāmat lekin

aa.ine TuuTe haiñ ik jhūTī ḳhabar se kyā kyā

kāTne vaale tujhe us kī ḳhabar bhī kuchh hai

vāste mere the us shāḳh-e-shajar se kyā kyā

fat.h kī aas yaqīñ azm hunar jiine kā

dafn siine meñ hue haar ke Dar se kyā kyā

tazkira jab bhī huā tīr-e-nazar kā us kī

zaḳhm hañste hue guzre haiñ nazar se kyā kyā

le gayā kaaT ke ye vaqt usī ko 'ash.har'

mo.ajize hone the jis dast-e-hunar se kyā kyā

kho diya main ne zarurat ke safar se kya kya

ab kahun kis se gaya hai mere ghar se kya kya

ek hum hi hain tahi-dast yahan se lauTe

warna paya hai sabhi ne tere dar se kya kya

zalimo hum hi nahin tum bhi yahin dekhoge

le ke lauTegi dua bab-e-asar se kya kya

tum to masruf rahe aag hi bhaDkane mein

jal gaya sine mein us soz-e-jigar se kya kya

phenk kar sang rahe tum to salamat lekin

aaine TuTe hain ek jhuTi KHabar se kya kya

kaTne wale tujhe us ki KHabar bhi kuchh hai

waste mere the us shaKH-e-shajar se kya kya

fath ki aas yaqin azm hunar jine ka

dafn sine mein hue haar ke Dar se kya kya

tazkira jab bhi hua tir-e-nazar ka us ki

zaKHm hanste hue guzre hain nazar se kya kya

le gaya kaT ke ye waqt usi ko 'ashhar'

moajize hone the jis dast-e-hunar se kya kya