kho diye hain chand kitne ek sitara mang kar

kho diye haiñ chāñd kitne ik sitārā maañg kar

mutma.in haiñ kis qadar phir bhī ḳhasāra maañg kar

mauj ke hamrāh thā to saarā dariyā saath thā

ho gayā ġharqāb lahroñ se kinārā maañg kar

raakh meñ ab DhūñDhtā huuñ maiñ dar-o-dīvār ko

ghar diyā hai aag ko maiñ ne sharāra maañg kar

terī marzī ho to bhar kashkol-e-dil ḳhālī mirā

maiñ nahīñ lūñgā tujhe tujh se dobāra maañg kar

apne paañv par chalūñgā maiñ apāhij to nahīñ

rāste kaTte nahīñ haiñ yuuñ sahārā maañg kar

ḳhvāb kī miTTī ko gūñdhūñgā lahū se maiñ 'figār'

ghar banānā hī nahīñ dhartī se gaarā maañg kar

kho diye hain chand kitne ek sitara mang kar

mutmain hain kis qadar phir bhi KHasara mang kar

mauj ke hamrah tha to sara dariya sath tha

ho gaya gharqab lahron se kinara mang kar

rakh mein ab DhunDhta hun main dar-o-diwar ko

ghar diya hai aag ko main ne sharara mang kar

teri marzi ho to bhar kashkol-e-dil KHali mera

main nahin lunga tujhe tujh se dobara mang kar

apne panw par chalunga main apahij to nahin

raste kaTte nahin hain yun sahaara mang kar

KHwab ki miTTi ko gundhunga lahu se main 'figar'

ghar banana hi nahin dharti se gara mang kar