kho gai ghairat-e-dil zauq-e-talab baqi hai

kho ga.ī ġhairat-e-dil zauq-e-talab baaqī hai

kaise mar jā.ūñ ki jiine kā sabab baaqī hai

jalva-e-sub.h kā manzar hai gulistāñ meñ to kyā

āshiyānoñ meñ abhī zulmat-e-shab baaqī hai

nashr ho jā.egī ḳhud kulfat-e-daurāñ kī hadīs

tere shā.ir meñ agar jur.at-e-lab baaqī hai

husn aur ishq meñ ik ḳhaas hai rabt-e-ulfat

dil salāmat hai to phir chashm-e-ġhazab baaqī hai

kūcha-e-ishq meñ dil aaj bhī hai sargardāñ

ab bhī vo shefta-e-āriz-o-lab baaqī hai

jab talak dahr meñ zinda hai zabān-e-urdu

raunaq-e-anjuman-e-sher-o-adab baaqī hai

gardish-e-vaqt kī raftār batātī hai 'sabā'

chashmak-e-soz-e-alam sāz-e-tarab baaqī hai

kho gai ghairat-e-dil zauq-e-talab baqi hai

kaise mar jaun ki jine ka sabab baqi hai

jalwa-e-subh ka manzar hai gulistan mein to kya

aashiyanon mein abhi zulmat-e-shab baqi hai

nashr ho jaegi KHud kulfat-e-dauran ki hadis

tere shair mein agar jurat-e-lab baqi hai

husn aur ishq mein ek KHas hai rabt-e-ulfat

dil salamat hai to phir chashm-e-ghazab baqi hai

kucha-e-ishq mein dil aaj bhi hai sargardan

ab bhi wo shefta-e-ariz-o-lab baqi hai

jab talak dahr mein zinda hai zaban-e-urdu

raunaq-e-anjuman-e-sher-o-adab baqi hai

gardish-e-waqt ki raftar batati hai 'saba'

chashmak-e-soz-e-alam saz-e-tarab baqi hai