کھو جائیں گے ہم تم بھی ملنے کا یہ پل جیسے

کھو جائیں گے ہم تم بھی ملنے کا یہ پل جیسے

کھو جاتا ہے ماضی میں بیتا ہوا کل جیسے

آؤ میری باہوں میں یوں آ کے سمٹ جاؤ

آغوش میں جمنا کے ہے تاج محل جیسے

دیوانہ مجھے کہہ کر محفل سے اٹھاتے ہو

تم کیوں نظر آتے ہو حافظؔ کی غزل جیسے

فرقت کا تو اک لمحہ صدیوں کو سمیٹے ہے

اے دوست مسرت کی اک عمر ہے پل جیسے

آنکھوں کا ہے یہ منظر ہونٹوں کا ہے یہ عالم

پانی میں کنول جیسے محفل میں غزل جیسے

حالات سعیدؔ اپنے کچھ ایسے ہی الجھے ہیں

بکھری ہوئی زلفوں میں پڑ جاتے ہیں بل جیسے