kho ke dil mera tumhein na-haq pashemani hui

kho ke dil merā tumheñ nā-haq pashemānī huī

tum se nādānī huī yā mujh se nādānī huī

allāh allāh phuuT niklā rañg chāhat kā mirī

zahr khāyā maiñ ne poshāk aap kī dhānī huī

ham ko ho saktā nahīñ dhokā hujūm-e-hashr meñ

terī sūrat hai azal se jānī-pahchānī huī

ai sabā maiñ aur kyā duuñ qabr-e-majnūñ ke liye

ḳhaak thoḌī sī chaḌhā denā mirī chhānī huī

yaar ke hāthoñ huā jo kuchh huā ai teġh-e-nāz

terī uryānī huī yā merī qurbānī huī

kar ga.ī dīvāngī ham ko barī har jurm se

chāk-dāmānī se apnī chāk-dāmānī huī

baaḌh dī bāñkī adāoñ ne jo ḳhanjar ko 'jalīl'

zab.h karne meñ mire qātil ko āsānī huī

kho ke dil mera tumhein na-haq pashemani hui

tum se nadani hui ya mujh se nadani hui

allah allah phuT nikla rang chahat ka meri

zahr khaya main ne poshak aap ki dhani hui

hum ko ho sakta nahin dhoka hujum-e-hashr mein

teri surat hai azal se jaani-pahchani hui

ai saba main aur kya dun qabr-e-majnun ke liye

KHak thoDi si chaDha dena meri chhani hui

yar ke hathon hua jo kuchh hua ai tegh-e-naz

teri uryani hui ya meri qurbani hui

kar gai diwangi hum ko bari har jurm se

chaak-damani se apni chaak-damani hui

baDh di banki adaon ne jo KHanjar ko 'jalil'

zabh karne mein mere qatil ko aasani hui