khoe hue the apni hi tanhaiyon mein hum

kho.e hue the apnī hī tanhā.iyoñ meñ ham

ubhre haiñ Duub Duub ke gahrā.iyoñ meñ ham

rakhte rahe na jaane kis andāz se qadam

Thahre haiñ taaq hādisa-paimā.iyoñ meñ ham

ye aur baat hoñT kabhī tar na kar sake

har chand tairte rahe purvā.iyoñ meñ ham

azmat mile to us ke ta.āqub meñ rah na jaa.eñ

ab tak to pesh pesh haiñ rusvā.iyoñ meñ ham

ho laakh sar pe shoa.la-fishāñ zindagī kī dhuup

chalte raheñge maut kī parchhā.iyoñ meñ ham

ubhre the saath mauj ke Duube bhañvar ke saath

le kar ga.e haiñ sat.h ko gahrā.iyoñ meñ ham

yakjā hue hayāt kī chuTkī se chauñk kar

bikhre hue the zaat kī pahnā.iyoñ meñ ham

'nāzish' hameñ to ḳhār-e-chaman bhī aziiz hai

mahdūd kyā hoñ phuul kī ra.anā.iyoñ meñ ham

khoe hue the apni hi tanhaiyon mein hum

ubhre hain Dub Dub ke gahraiyon mein hum

rakhte rahe na jaane kis andaz se qadam

Thahre hain taq hadisa-paimaiyon mein hum

ye aur baat honT kabhi tar na kar sake

har chand tairte rahe purwaiyon mein hum

azmat mile to us ke taaqub mein rah na jaen

ab tak to pesh pesh hain ruswaiyon mein hum

ho lakh sar pe shoala-fishan zindagi ki dhup

chalte rahenge maut ki parchhaiyon mein hum

ubhre the sath mauj ke Dube bhanwar ke sath

le kar gae hain sath ko gahraiyon mein hum

yakja hue hayat ki chuTki se chaunk kar

bikhre hue the zat ki pahnaiyon mein hum

'nazish' hamein to KHar-e-chaman bhi aziz hai

mahdud kya hon phul ki ranaiyon mein hum