khoi manzil kahan pata hi nahin

khoī manzil kahāñ pata hī nahīñ

aañkh se aage kuchh dikhā hī nahīñ

kone meñ hī khaḌī rahīñ ḳhushiyāñ

maiñ magar biich se haTā hī nahīñ

vo adālat meñ le gayā āvāz

jab se lauTā hai boltā hī nahīñ

dard kī dhuup tez thī phir bhī

merā saayā mujhe dikhā hī nahīñ

aks ko dekhte hī TuuT gayā

aa.ina us kā ab rahā hī nahīñ

muḌ ke dekhā thā tum ne raah meñ bas

ik qadam bhī maiñ phir chalā hī nahīñ

mujh ko to marnā hī thā vaise bhī

zindagī terī kuchh ḳhatā hī nahīñ

kis zabāñ meñ hayāt ne likkhā

she'r mujh par kabhī khulā hī nahīñ

khoi manzil kahan pata hi nahin

aankh se aage kuchh dikha hi nahin

kone mein hi khaDi rahin KHushiyan

main magar bich se haTa hi nahin

wo adalat mein le gaya aawaz

jab se lauTa hai bolta hi nahin

dard ki dhup tez thi phir bhi

mera saya mujhe dikha hi nahin

aks ko dekhte hi TuT gaya

aaina us ka ab raha hi nahin

muD ke dekha tha tum ne rah mein bas

ek qadam bhi main phir chala hi nahin

mujh ko to marna hi tha waise bhi

zindagi teri kuchh KHata hi nahin

kis zaban mein hayat ne likkha

she'r mujh par kabhi khula hi nahin