kholega raaz kaun teri kaenat ke

kholegā raaz kaun tirī kā.enāt ke

laale paḌe hue haiñ yahāñ apnī zaat ke

yuuñ ruuī se ḳhayāl ko rakhtā huuñ kaat ke

uḌte phireñ ro.eñ na kahīñ merī baat ke

sab muntazir haiñ aisī kisī apnī maat ke

khul jaa.eñ sab bharam kisī rāh-e-najāt ke

suntā huuñ mujh se māñgtī hai maut bhī panāh

vo parḳhachche uḌaa.e haiñ maiñ ne hayāt ke

ḳhud ko sameTne ke bakheḌe meñ kyuuñ paḌe

kaahe ko ho ke rah na ga.e hādsāt ke

in āñdhiyoñ pe zor chaman kā to kuchh na thā

qisse bikhar ga.e haiñ magar paat paat ke

kam ye bhī to ḳhalāoñ meñ taḳhlīq se nahīñ

jaise mahal kiye haiñ khaḌe mushkilāt ke

is se ziyāda ret ke tūfān tujh meñ haiñ

jharne tirī nigāh meñ jitne haiñ zaat ke

nauha-kunāñ azal se andheroñ meñ haiñ sadā.eñ

ye dukh to haiñ sadāoñ kī bas ek raat ke

Takrāo be-sabab jo nazar aur dil kā thā

afsāne sab ne ghaḌ liye ek raat ke

sach sach batā ki 'talḳh' ye dil kī navā meñ yuuñ

kaise kiye haiñ jam' ye dukh kā.enāt ke

kholega raaz kaun teri kaenat ke

lale paDe hue hain yahan apni zat ke

yun rui se KHayal ko rakhta hun kat ke

uDte phiren roen na kahin meri baat ke

sab muntazir hain aisi kisi apni mat ke

khul jaen sab bharam kisi rah-e-najat ke

sunta hun mujh se mangti hai maut bhi panah

wo parKHachche uDae hain main ne hayat ke

KHud ko sameTne ke bakheDe mein kyun paDe

kahe ko ho ke rah na gae hadsat ke

in aandhiyon pe zor chaman ka to kuchh na tha

qisse bikhar gae hain magar pat pat ke

kam ye bhi to KHalaon mein taKHliq se nahin

jaise mahal kiye hain khaDe mushkilat ke

is se ziyaada ret ke tufan tujh mein hain

jharne teri nigah mein jitne hain zat ke

nauha-kunan azal se andheron mein hain sadaen

ye dukh to hain sadaon ki bas ek raat ke

Takrao be-sabab jo nazar aur dil ka tha

afsane sab ne ghaD liye ek raat ke

sach sach bata ki 'talKH' ye dil ki nawa mein yun

kaise kiye hain jam' ye dukh kaenat ke